Margrét Guðvarðardóttir

2004-06-16T11:45:00.000Z

Muse

2003-12-11T00:06:00.000Z

Jæja, nú er langt síðan ég kom hérna inn á bloggið mitt, jah alveg tíu dagar. Ég var á alveg frábærum Muse tónleikum í Höllinni í kvöld. Það var gargandi stemning enda mjög gott band þarna á ferð.

Nú fara prófin að verða búin, ég fer nú bara í eitt og það er ekki fyrr en 18. des. þannig að ég er búin að vera í jólafríi núna undanfarna daga. Það er nóg að gera fyrir jólin og ekki seinna vænna að byrja að versla einhverjar jólagjafir.

Jæja ég ætla ekki að hafa þetta lengra og óska öllum gleðilegra jóla

Námskeiðið Upplýsingatækni og skólastarf

2003-12-01T01:21:00.000Z

Mér hefur fundist þetta námskeið, Upplýsingatækni og skólastarf, hafa verið alveg hreint stórskemmtilegt. Þetta er að sjálfsögðu búið að vera mikil vinna en engu að síður skemmtileg. Alltaf ef ég hef átt að skila tveimur verkefnum í einu, í einhverju fagi og svo Upplýsingatækninni, þá hef ég alltaf tekið upplýsingtæknina fram yfir af því að það er svo gaman að vinna þessi verkefni. Ég hef að sjálfsögðu líka unnið hin verkefnin en þau hafa alltaf verið nr. 2 á listanum hjá mér.

Ég vil því bara þakka kennaranum og samnemendum mínum fyrir þennan frábæra áfanga þó svo við höfum nú ekki mikið hist þá hefur maður aðeins fylgst með í gegnum bloggið, þ.e. með því að skoða bloggið hjá hinum nemendunum.

Jæja segi þetta gott í bili, læt nú örugglega heyra í mér fyrr en síðar.

Loka höndin

2003-12-01T01:13:00.000Z

Ég er búin að vera að leggja loka höndina á persónulega vefinn minn í dag. Hann er að verða nokkuð fínn að mér finnst. Ég er búin að setja inn myndir á tæknisöguna mína og einnig setti ég inn video af Alexöndru og Gabríel, ég setti það inn á skilasíðuna mína bara svona til gamans. Ég vann þau ekki í Movie Maker heldur í Adobe Premiere 2. Ég held að það gæti verið svolítið erfitt að keyra upp þessi myndbönd ef maður er ekki með ADSL tengingu.

Ég er líka búin að bæta aðeins við myndaalbúmið mitt, ég setti inn myndir af Gabríel í ungbarnasundi. Það er alltaf svo gaman að skoða svona myndir og ég tel að það sé aldrei nóg af þeim.

Ég held að ég sé búin að skila öllum þeim verkefnum sem ég hef átt að skila mjög samviskusamlega og hef tekið þátt í þeim umræðum sem ætlast var til af okkur. Öll verkefni og upplýsingar um þau eru að finna á skilasíðunni minni á persónulega vefnum mínum.

Líður að lokum

2003-11-28T23:58:00.000Z

Nú fer námskeiðið Upplýsingatækni og skólastarf að líða undir lok. Ég er búin að vera eitthvað að brasa við að leggja lokahönd á persónulega vefinn minn og ég held svei mér þá að hann sé að verða nokkuð góður. Ég held að allar tengingar virki vel og öll verkefni séu til staðar á síðunni.

Annars er ég núna líka búin að skoða powerpoint kynningarnar hjá hinum staðnemunum sem ég var ekki búin að skoða og mér finnst þetta rosalega flott hjá þeim. Einnig er ég búin að vera að skoða persónulegu vefina þeirra og mér finnst þeirra síður ekkert vera endilega betri en okkar sem erum búin að vera í þessum áfanga í fjarnámi. Það sem er betra er skólaverkefnið og Powerpoint kynningin þeirra þar sem þau fengu mun betri kennslu í því en við. Annars er þetta bara mjög svipað hjá öllum en mér finnst þó að hjá sumum eru tengingarnar ekki réttar, stundum er ekkert á bak við þær.

Ég á enn eftir að setja inn myndir á tæknisöguna mína, þvílíkt framkvæmdarleysi en ég skal sko láta ykkur vita þegar þær koma inn en það verður alla vega ekki seinna en á mánudag því það er jú þá sem við eigum að vera búin að skila því sem við ætlum að skila í þessum áfanga.

Ferilskrá

2003-11-25T19:15:00.000Z

Í dag kláraði ég ferilskránna mína. Ég þarf reyndar kannski að setja inn betri mynd af mér en ég held að þetta sé í lagi eins og er. Ég setti ferilskrána upp í töflu til þess að hún kæmi sem best út. Einnig setti ég inn link á heimasíðuna sem ég gerði í fyrra í KHÍ bara svona til gamans.

Innlit hjá staðnemum

2003-11-25T17:57:00.000Z

Í þessari lotu áttum við að líta á bloggið og skilasíðurnar hjá staðnemunum. Ég hef reyndar fylgst aðeins með þeim þar sem vinkonur mínar eru í þessum áfanga í staðnámi. Það eru þær Elín, Gyða, og Freydís. Ég er búin að skoða Powerpoint kynninguna þeirra sem er hreint ágæt. Einnig skoðaði ég aðra Powerpoint kynningu og það var hjá henni Margréti og kynningin henner er um tannhirðu. Þetta er mjög áhugaverð kynning. Þarna sýnir hún hvernig bursta eigi tennurnar og hvernig nota eigi tannþráð o.þ.h. Þessar kynningar koma bara vel út og ég heyrði allt sem sagt var.

Ég held að ef ég hefði haft aðeins meiri tíma í vetur þá hefði ég smellt inn svona video á kynninguna mína. Ég hef bara haft svo rosalega mikið að gera við að sinna honum Gabríel mínum sem er að verða 4 mánaða og henni Alexöndru minni ásamt öllum hinum fögunum sem ég er í. Kannski verð ég rosalega dugleg í jólafríinu og skelli svona video á kynninguna mína. Við sjáum nú til með það.

Einnig er ég búin að skoða stuttmyndirnar hennar Salvarar sem voru unnar í Movie maker. Þar var t.d. stuttmynd þar sem Ólafur Ragnar Grímsson forseti vor kom í heimsókn í Skipholtið. Það var allt í lagi að horfa á þessa mynd en hún far dálítið höktandi.

Langt um liðið

2003-11-24T12:25:00.000Z

Ja hérna, hvað tíminn líður hratt. Nú eru liðnir ansi margir dagar síðan ég hef skrifað í bloggið mitt en nú ætla ég að taka mig á. Það er bara búið að vera brjálað að gera hjá mér í verkefna vinnu undanfarna daga.

Á miðvikudaginn síðasta gerðist ég rosalega góður tölvunörður því hún Gyða vinkona mín úr Kennó kom í heimsókn og ég var að aðstoða hana með persónulega vefinn sinn þar sem hún þurfti að flýta sér að klára hann. Þetta gekk nú bara sæmilega og ég gat deilt með henni minni vitneskju um tölvur og tölvumál.

Ég á enn eftir að setja inn myndir á tæknisöguna mína og á eftir að klára ferilskrána áður en ég vippa henni yfir á vefinn minn. Ég ætla að bæta úr þessu núna á næstu dögum.

Vangaveltur

2003-11-12T11:09:00.000Z

Það er eitt sem ég er að spá í í sambandi við þessar breytingar mínar á blogginu, hvernig get ég breytt dagsetningunni, það stendur alltaf t.d. miðvikudagur, nóvember 12, 2003 en ég mundi vilja hafa þetta, miðvikudagur, 12. nóvember 2003. Ef það er einhver sem les þetta og veit hvernig á að breyta þessu þá má hinn sami senda mér e-mail á margo@internet.is. Kærar þakkir.

Skipti um template

2003-11-12T00:31:00.000Z

Ég ákvað að vera soldið klár núna í kvöld og skipti um template á síðunni minni. Ég var frekar smeik í byrjun en svo var þetta bara ekkert mál. Ég á reyndar eftir að gera meira og kannski ég breyti aftur um template en þetta var alla vega góð byrjun. Finnst ykkur ekki. Þá þarf ég núna að koma inn comments og ég ætla að reyna að gera það á morgun. Góða nótt og bless í bili.

Vettvangsnám

2003-11-11T11:56:00.000Z

Í dag var ákveðið í hvaða skóla ég fer í vettvangsnám á næstu önn og það var Lindaskóli í Kópavogi sem varð fyrir valinu. Ég er það heppin að skólinn er nánast við hliðina á húsinu mínu og því ekki langt að fara. Ég og Elín æltum að fara saman og ég held að þetta verði gagnlegt og gaman. Við ætlum að vera í 4. bekk. Okkur langaði frekar að fara í svo til nýjan skóla þar sem við vorum í Langhotsskóla í fyrra sem er mjög gamall skóli. Ekki það að hann hafi verið neitt slæmur þá er bara gaman að prófa að fara í nýjan skóla og sjá munin á þeim. Ég fór einmitt í Lindaskóla fyrir skólaverkefnið í faginu Upplýsingatækni og skólastarf og mér leist nú bara nokkuð vel á skólann og starfsmenn voru viðkunnalegir. Þannig að ég hlakka bara til að fara í æfingakennsluna á næstu önn.

GSM Blogg

2003-11-07T14:27:00.000Z

Ég skráði mig á GSM blogg hjá Og Vodafone og prófaði svo að hringja í síma 595-6688 og talaði inn á það. Útkoman er hérna fyrir neðan. Þetta er ekki flókið og ég mundi hvetja alla sem vilja nýta sér tæknina að prófa þetta bara svona til gamans. Ég held að þetta gæti verið ágætis leið fyrir kennara að koma skilaboðum til nemenda, þá sérstaklega í fjarkennslu. Kennarinn verður aðeins raunverulegri þegar nemendur heyra í honum röddina.

Skilaboð sendi ég
Sent með GSMbloggi Og Vodafone

2003-11-07T09:49:00.000Z

GSMblogg prufa

Í dag

2003-11-04T00:04:00.000Z

Já, í dag er ég búin að gera ýmislegt, t.d. náði ég að klára myndaalbúmið mitt, kannski set ég reyndar meira inn á það síðar en ég er alla vegana komin vel af stað með það. Ég setti inn bookmark til þess að auðveldara sé að ferðast um síðuna og svo minnkaði ég allar myndirnar til þess að auðveldar sé fyrir aðra aðila að skoða þessa síðu. Það gerði ég í Photoshop, ekki mikið mál.

Svo las ég póstinn frá henni Salvöru og fór auðvitað og hlustaði á skilaboðin frá henni á blogg síðunni hennar fyrir þetta námskeið og mér fannst þetta bara nokkuð sniðugt. Ég held að þetta geti komið sér vel í fjarkennslu.

Í sambandi við myndaalbúmið

2003-11-03T11:12:00.000Z

Ég er búin að gera smá í myndaalbúminu mínu en allt í einu fór ég að spá í hvort myndirnar væru ekki of stórar. Því þeir sem eru ekki með öfluga tenginu eiga örugglega í vandræðum með að opna siðuna eða alla vegana þurfa að bíða heillengi þannig að ég er að spá í hvort ég eigi ekki að minnka myndirnar aðeins þannig að það sé auðvelt fyrir alla að skoða síðuna. Ég held að það sé best.

Tókst

2003-11-03T11:06:00.000Z

Það tókst að koma powerpoint kynningunni minni inn á vefinn minn og þar inn á skilasíðuna og þar undir PowerPoint kynning. Þær eru reyndar tvær, sú fyrri er kynningin ásamt speaker notes en sú seinni er bara plaine glærukynning. Hún er nú reyndar dálítið lengi að opnast þannig að það er betra bara að skoða hana ásamt speaker notes. Þetta ákvað ég nú bara að gera svona til gamans, ég fór inn í file, import og valdi síðan það skjal sem átti að fara, fyrst setti ég inn ppt skjal en sá að það var bara glærukynning en ekki speaker notes þannig að ég fór að skoða þetta betur og fór aftur inn í kynninguna mína og save-aði hana sem web page og þá kom hún með speaker notes eins og ég átti að gera í upphafi þannig að ég lét þær bara vera þarna báðar.

Ég er ekki ennþá búin að setja inn myndirnar fyrir tæknisöguna en það stendur allt til bóta núna á næstunni, einnig að klára að gera ferilskránna.

Prófin

2003-11-02T23:35:00.000Z

Þetta er nú alveg glatað með þessi próf. Málið er það að ég fer bara í eitt próf þar sem ég er í svo mörgum áföngum sem setja bara hellinga af verkefnum. Það er nú reynar fínt en þá er mikið að gera alla önnina. En alla vegana þá er þetta ein próf sem ég er að fara í þann 18. desember og mér finnst það hræðilegt. Ef það hefði verið bara 3. des hefði ég fengið rosa fínt og langt jólafrí og getað notið þess að vera með Alexöndru og Gabríle og bara chillað og bakað og skrifað jólakort og fleira. En nei ekki alveg, þess vegna ætla ég að vera í jólafríi frá 1. des og til svona 10. eða 11. des og byrja þá að læra undir prófið. Það væri ekki hægt að vera að læra allan desember undir eitt próf og hvað þá sálfræði þá mundi maður nú fyrst þurfa á sálfræðingi að halda. En ég ætla bara að gera gott úr þessu, fæ þessu ekki breytt úr þessu þannig að svona er þetta.

Ungbarnasund

2003-11-02T23:31:00.000Z

Nú er ég byrjuð með hann Gabríel í ungbarnasundi hjá honum Snorra Magnússyni í Skálatúnslaug í Mosfellsbæ. Ég er nú bara búin að fara í einn tíma en er að fara aftur á morgun og hlakka alveg gríðarlega til. Í fyrsta tímanum stóð kallinn sig alveg frábærlega, hann náði að standa alveg blíspertur og kafaði og allt og var rosa ánægður með þetta, var reyndar ansi dasaður eftir þetta og svaf eins og engill í marga marga klukkutíma. Ég var meira að segja farin að verða pínu óróleg af því að hann svaf svona mikið en Snorri (kennarinn) var búinn að var okkur við þessu þannig að ég sat á mér, ég var ekki komin með spegilinn framan í hann til að athuga hvort hann andaði, nei ég var ekki orðin það desperat. En þetta er rosalega spennandi og Finni er að vinna í svo góðri vinnu þannig að hann getur alltaf komið með mér. Og svo er líka María systir þarna með Manúel Breka á sama tíma og við verðum þannig að þetta er allt saman rosalega spennandi og skemmtilegt

Það er rosalega mikið að gera í skólanum um þessar mundir og ég er alveg á haus en ég ætla að taka þetta með nettu kæruleysi því þá gengur allt upp, það gerir það allavegna yfirleitt. Nú er ég að standa í skilum á stærðfræðiverkefni sem gildir 40% af lokaeinkunn og á að skila því á þriðjudaginn, ég er nú reyndar langt komin með það þannig að ég er ekki stressuð yfir því.

Jæja ætla að koma mér í háttinn núna. Góða nótt ZZZZZZZ

Powerpoint

2003-11-02T23:24:00.000Z

Jæja, ég gleymdi að setja powerpointið inn í gær en er að reyna að gera það núna. Mér finnst þetta frekar flókið þar sem ég er búin að gleyma því hvernig ég gerði þetta í fyrra en ég er að reyna að vinna úr þessu núna. Þetta verður vonandi komið inn á síðuna mína fyrr en varir. Annars hef ég nú bara samband við hana Salvöru og spyr hana hvernig sé best að gera þetta.

Skólaverkefni

2003-10-28T13:05:00.000Z

Ég er búin að fara upp í Lindskóla og taka viðtal við hana Sigríði Tryggvadóttur tölvukennara þar. Síðan er ég búin að vera að hamast við að vinna í þessu og setja verkefnið upp á síðunni minni. Þetta hefur gengið mjög vel fyrir utan smá vandamál. Sniðið hans Torfa sem ég ætlaði að nota var ekki alveg í lagi eða alla vegna tenglarnir þannig að ég notaði það en setti bara inn bookmark sjálf til að hægt væri að ferðast um síðuna á sem auðveldastan hátt. Ég setti líka inn nokkrar myndir til þess að gera þetta skemmtilegra. En núna er ég búin með þetta, á kannski eftir að fara aðeins yfir stafsetningavillur og þess háttar en ekkert mikið. Næst á dagskrá er að skella powerpoint kynningunni minni inn á vefinn og klára myndaalbúmið.

Myndaalbúm og fleira

2003-10-26T11:35:00.000Z

Ég er byrjuð á myndaalbúminu sem ég ætla að hafa á vefnum mínum. Þetta var nú ekki eins flókið og ég hélt í upphafi. Ég fór inn í Insert - Web Componment - Photo Gallery og valdi svo myndirnar sem ég vildi hafa, skrifaði texta við þær og þá var þetta komið. Ekki mjög flókið það. Núna er ég að vinna í því að klára PowerPoint verkefnið mitt um pýramídana í Egyptalandi og er að vinna í skólaverkefninu.

Ég fór inn á Skólaspjallið og var að lesa útskýringu á því hvernig ég kem inn glærukynningunni minni en mér fannst þetta frekar skrýtin útskýring þannig að ég ætla að reyna að spyrjast fyrir um þetta til þess að fá betri útskýringu. Ég gerði þetta reyndar hjá honum Torfa í fyrra en ég bara man ekki alveg hvernig ég fór að þessu. En ég hlýt að finna út úr þessu ef ég fæ ekki hjálp.

Núna ætla ég samt bara að fara að hafa það gott með familýjunni, þar sem það er nú sunnudagur, og gera eitthvað skemmtilegt.

Hérna eru þau Alexandra og Gabríel, sætustu börn í heimi. Að mínu mati alla vegna.

Template

2003-10-21T09:53:00.000Z

Ég er að velta því fyrir mér að skipta um template á blogg síðunni minni. En ég er ekki alveg viss um hve mikið dettur út af henni við það. Ég er að spá í að fara inn á skólaspjallið og setja inn fyrirspurn. Ég held að það væri frekar sniðug hugmynd.

Ný e-mail adressa

2003-10-21T09:28:00.000Z

Hvað haldið þið? ég er búin að fá mér nýja e-mail adressu og hún er margo@internet.is. Ég ákvað að hætta með finni@isl.is af því að hún er ekki búin að leifa mér að opna viðhengi núna í tvo mánuði og ég er orðin frekar forvitin um það hvað er í þessum viðhengjum.

Ég er búin að fara nokkrum sinnum inn á skólaspjallið og líst bara nokkuð vel á þetta. Um leið og maður er búin að átta sig á því hvernig þetta virkar allt saman og hvað maður ætlar að skoða þá er þetta ekkert mál.

Jæja, ætla að reyna að halda áfram að læra áður en Gabríel vaknar því síðan er ég að fara í lunch á Maru og hitta Maríu, Manúel Breka og Gullu. Þannig að það er betra að vera búin að læra eitthvað áður. Ég á að skila svo mörgum verkefnum núna á næstu tveimur vikum að þetta er að gera mig gráhærða.

Skólaverkefnið

2003-10-19T11:41:00.000Z

Ég er búin að finna mér skóla fyrir skólaverkefnið. Það var Lindaskóli í Kópavogi sem varð fyrir valinu. Ég ætla að vinna þetta verkefni ein þar sem ég er með lítið barn og á frekar erfitt að mæla mér mót við hóp fólks til að vinna verkefni. Ég hef þegar talað við tölvukennarann í skólanum og hún ætlar að taka á móti mér á mánudaginn og leifa mér að spyrja sig spjörunum úr. Hún talaði við skólastjórann til að fá samþykki og það var nú lítið mál. Ég ætla að fara með diktafóninn minn, kannski maður nái einhverju betur ef maður er með hann í gangi en ég ætla samt ekki að treyst alfarið á hann, ætla að skrá allt niður hjá mér líka. Einnig ætla ég að taka digital myndavélina mína með, hún er svo rosalega fín og það er svo auðvelt að vippa myndunum úr henni og beint inn í tölvuna. Ég ætla að notast við snið frá honum Torfa í uppsetningunni á verkefninu, mér leist nefninlega ágætlega á það.

Jæja þetta var nú svona það helsta um þetta verkefni.

Vefspjallið

2003-10-13T11:51:00.000Z

Nú er ég búin að skrá mig inn á vefspjallið á www.asta.is/spjall. Þetta var bara nokkuð skemmtilegt, ég tók þá í nokkrum umræðuefnum, prófaði að setja inn myndir og hyperlinka. Þetta gekk allt nokkuð vel. Mér líst ágætlega á þetta en maður þarf að hafa dálítið góðan tíma til þess að fara í gegnum þetta, skoða og taka þátt. Maður á fullt í fangi með það sem maður þarf að skoða nú þegar. En þetta er skemmtilegt og gaman að taka þátt í þessu. Þarf bara að gefa sér tíma til að skoða þetta.

Ég er ekki búin að geta lært mikið undanfarna daga en er nú komin aftur til leiks og ætla að taka mig á. Þið munuð sjá það á næstu dögum.

Leikurinn

2003-10-11T19:58:00.000Z

Jæja, þá er þetta búið hjá okkur Íslendingurm, draumurinn um að komast á HM í fótbolta eftir að við töpuðum gegn Þjóðverjum í Hamborg í dag. En við þurfum nú ekki að vera neitt hrikalega svekt því þetta er okkar besti árangur til þessa og ég hef trú á því að við eigum eftir að láta sjá okkur í þessari keppni innan fárra ára.

Fólk var nú mis ákaft í að fara á leikinn úti í Þýskalandi. Bróðir minn og pabbi voru svo rosalegir að þeir flugu til Amsterdam kl. 7:00 í morgun og keyrðu svo þaðan yfir til Hamborgar, rosa keyrsla og rétt náðu á leikinn. Þeir fengu þó að horfa á skemmtilegan leik og geta þó farið á ballið í kvöld sem Íslendingarnir verða með þarna úti í kvöld.

Ég fékk alveg nóg út úr því að horfa á þetta heima hjá mér eins og örugglega flestir landsmenn. Ég segi nú bara "Áfram Ísland"!!!!!!

Búin

2003-10-09T20:11:00.000Z

Jæja þá er ég loksins búin að klára vefleiðangurinn minn, það er að segja hann er full búinn inni á persónulega vefnum mínum. Það er búið að vera svo mikið að gera hjá mér undanfarna daga að mér hefur bara ekkert orðið úr verki. Þetta eru bara endalaus verkefni, afmæli og þess háttar dæmi. En núna er ég komin á fullt aftur og þarf því að vinna pínulítið upp en það er bara gaman.

Ég fór á foreldrafund á leikskólanum hennar Alexöndru og talaði þar við deildarstjórann á hennar deild. Það var alveg frábært því ég á fyrirmyndar barn. Hún er alltaf góð í leikskólanum og á fullt af vinum og allt gengur eins og í sögu. Ég var reglulega stolt af henni, hún er svo sæt og góð.

Gabríel er búinn að vera nokkuð hress, hann sefur eins og engill á nóttunni, sem betur fer því ég er algjör svefnpurka. Ég fór reyndar með hann í afmæli til Móses á þriðjudaginn og hann var ekki alveg sáttur við allt þetta fólk og var frekar pirraður á þessu öllu saman. En ég fór síðan með hann í skoðun á miðvikudagsmorguninn og hjúkkan var rosalega ánægð með hann, hann var búinn að þyngjast alveg "heví" mikið, er orðinn sex kíló og 60 cm. Það er frekar stórt miðað við tveggja mánaða barn. Hann er nú líka svo duglegur að drekka, vill helst vera að allann daginn en ég leyfi honum það nú ekki alveg.

Karamellumyndin

2003-10-07T13:31:00.000Z

Ég var að horfa á alveg frábæra mynd, Karamellumyndina. Í henni leika Jón Gnarr, Mariko Margrét, Gísli Örn, Þórhallur Sverrisson (bróðir minn sem stendur sig rosalega vel í þessari mynd), Elma Lísa og einhver lítil stelpa. Þetta er mjög skemmtilega stuttmynd, hún er aðeins 15 mínútur eða svo. Endilega skoðið hana, hún verður í boði þarna þangað til kl. 18:00 á fimmtudaginn.

Verkefnaskil

2003-10-04T13:53:00.000Z

Núna er ég að verða búin með vefleiðangurinn minn, ég er búin með tæknisöguna en á eftir að setja myndir og fínpússa hann aðeins á persónulega vefnum. Í sambandi við persónulega vefinn þá er ég byrjuð á honum, ég ætla að hafa það helsta inn á honum en einnig ætla ég að hafa ferilskrá og myndaalbúm. Ég ætla að vinna betur í þessu næstu daga þar sem er búið að vera mjög mikið að gera hjá mér í barnauppeldi síðustu daga.

Vefleiðangur

2003-10-01T21:55:00.000Z

Vefleiðangurinn minn á að vera um áhugaverða staði á Íslandi. Bekknum er skipt upp í 4 hópa og hver hópur tekur fyrir einn áhugaverðann stað. Í boði er einn staður í hverjum landshluta. Hópurinn þarf að gera ritgerð um staðinn, kanna alla möguleika á að komast þangað og hvað það muni ca. kosta. Hver hópur útbýr kynningu sem hann flytur síðan fyrir hina hópana. Flutningurinn getur verið í hvaða formi sem er, t.d. leikþáttur, útvarpsþáttur, fyrirlestur, svo eitthvað sé nefnt. Í stofunni verður sett upp landakort sem allir í bekknum útbúa saman og hver hópur teiknar síðan inn sinn stað og setur inná myndir sem einkennir staðinn.

Þetta er nú bara svona rétt smá kynning á þessu verkefni en það verður komið inn á síðuna mína, full unnið, á næstu dögum.

Persónulegur vefur

2003-09-29T13:41:00.000Z

Ég er búin að rigga upp persónulegum vef og hann er undir http://nemendur.khi.is/marggudv/skolastarf. Hann er nú kannski ekki langt kominn en samt þó eitthvað smá. Núna á næstunni ætla ég að setja inn myndir og svoleiðis skemmti efni. Ég er að velta fyrir mér hvort ég eigi ekki að setja link frá síðunni minni frá því í fyrra og yfir á þessa, það væri nú svolítið sniðugt, ekki satt.

Ég er ennþá að reyna að finna mér efni fyrir vefleiðangurinn, mér finnst það svolítið erfitt en það kemur, ég á nefninlega að skila inn hugmynd af honum á miðvikudaginn. Síðan er ég líka að vinna í powerpoint kynningunni minni.

Í sambandi við tæknisögu

2003-09-26T15:03:00.000Z

Ég er búin að setja inn tæknisöguna, en ég á nú eftir að vinna betur í henni áður en hún fer á vefinn. Ég ætla að setja inn myndir og eitthvað svona sniðugt til þess að gera þetta skemmtilegt. Annars er ég búin að vera á kafi í verkefnum í hinum fögunum sem ég er í en þeim er að ljúka og þá dembi ég mér aftur í verkefnin í upplýsingatækninni. Ég er komin ágætlega á veg með vefinn fyrir námskeiðið þannig að ég er í góðum málum, að ég held. Ég er að leggja hausinn í bleiti varðandi vefleiðangurinn, en þetta kemur örugglega allt saman fyrr en síðar.

Tæknisaga

2003-09-26T15:00:00.000Z

Ég nota tölvu mjög mikið, þar sem ég er í fjarnámi þarf ég að vinna á hana á hverjum degi og fara inn á netið oft á dag. Fjarnámið fer allt í gegnum netið og því gott að vera með góða internet tengingu. Ég lét því slag standa og fékk mér ADSL IV hjá Og Vodafone, sem mjög hraðvirkt, þvílíkur munur. Áður var ég með netið í gegnum símalínu, það var allt í lagi á meðan ég var í staðnáminu en eftir að ég flutti mig yfir í fjarnám dugði það ekki til.

Ég er með fartölvu heima hjá mér, hún er nú reyndar það öflug að hún leysir alveg heimilistölvuna af. Þetta er Sony tölva og hún er algjör snilld. Við höfum verið að dunda okkur við að setja heimilisbókhaldið inn í Microsoft Money, mjög sniðugt forrit til að halda utan um fjármálin.

Ég nota internetið mjög mikið til að afla mér upplýsinga um hitt og þetta, þær leitarvélar sem ég nota mest eru goggle.com og leit.is, þær hafa reynst mér mjög vel. Ég hef ekki verið í því að versla á netinu og ekki heldur að hlaða niður mikið af dóti af því en maðurinn minn hefur reyndar eitthvað gert af því.

Ég byrjaði fyrst að nota tölvu þegar ég byrjaði í menntaskóla, árið 1993. Þá kunni ég nákvæmlega ekki neitt, þetta var allt gjörsamlega nýtt fyrir mér, ég hafði reyndar verið aðeins í tölvum í grunnskóla en það var svo lítið að ég tel það varla með. Í menntaskóla var krafist þess að við skiluðum verkefnum tölvuunnum þannig að ég kunni aðalega á word. Ég lærði aðeins á Excel en ekkert að viti. Ég ákvað síðan árið 2000 að skella mér í Viðskipta- og tölvuskólann í Alhliða tölvunám og því sé ég aldrei eftir, þarna opnaðist fyrir mér nýr heimur, tölvur eru ekkert til að hræðast, og viti menn ég útskrifaðist þaðan með besta námsárangur á þessari braut með 9,35 í meðaleinkunn. Síðan þá hefur tölvan verið mér nauðsynleg. Í VT setti ég upp mína fyrstu heimasíðu í Front Page þannig að ég kunni dálítið í heimasíðugerð þegar ég byrjaði í Kennaraháskólanum haustið 2002.

Við erum líka með eina leikjatölvu á heimilinu, Playstation II, sem ég nota ekki en ég horfi samt á DVD myndir í henni. Ég og maðurinn minn eigum bæði GSM síma, ég held að ég hafi fengið mér minn 1999, annars er ég ekki alveg viss. Fyrst í stað fannst mér ekki mikið til hans koma en núna er eins nauðsynlegt að hafa hann meðferðis eins og að klæða sig í skó áður en maður fer út.

Ég hef notað tölvupóst mikið þar sem ég á vini sem búa erlendis og skrifum við fréttir hver af öðrum í gegnum tölvupóst. Einnig hef ég notað tölvupóstinn mikið eftir að ég byrjaði í KHÍ því við stöllurnar í bekknum mínum höfum samskipti utan skólans í gegnum tölvupóst, t.d. skiptast á glósum, bjóða í partý og þess háttar. Reyndar hef ég minkað að nota tölvupóstinn eftir að ég kynntist MSN sem er snilldarlegt samskipa forrit. Ég get spjallað við vini mína sem búa í útlöndum. Einnig höfum við prófað að vera með video cameruna í gangi og þá sér aðilinn, sem maður talar við á MSN, mann í beinni útsendingu, ef svo má að orði komast.

Við eigum digital Sony video vél sem við keyptum okkur fyrir þremur árum, við höfum notað hana mjög mikið. Það sem við erum að reyna að vinna í núna er að klippa allt efnið okkar í nýju fartölvunni okkar til þess að það sé meira gaman að horfa á videoið og sýna öðrum, því það er jú oft svo mikið af auka efni á þessum spólum sem maður nennir ekki að horfa á. Einnig eigum við digital myndavél sem er af gerðinni Canon, hún er algjör snilld. Nú er hægt að taka alveg helling af myndum, svo sigtar maður bara út það besta og hleður þessu svo inn í tölvuna og sendir síðan vinum og vandamönnum nýjustu myndirnar. Fyrst minnkum við þær dálítið í Photoshop.

Framtíðarsýn
Ég tel að tækninni eigi eftir að halda áfram að fleygja fram eins og hún hefur gert á síðustu árum. Ég tel að ég eigi eftir að nota tölvur mjög mikið bæði heima og í starfi. Kennarar eru nú þegar farnir að nota tölvur mikið til þess að auðvelda sér vinnuna og tel ég að það eigi eftir að halda áfram. Hver veit nema að maður fari að versla í matinn í gegnum netið og fái síðan vörurnar sendar heim, ég vil samt síður fara að hugsa út í það því mér finnst frekar lélegt þegar fólk getur ekki einu sinni rifið sig á fætur og drattast út í búð til þess að versla fyrir heimilið. Samskipti manna á milli fara örugglega mun meira fram í tölvum, það er nú orðið svoleiðis nú þegar, það eru nánast allir hættir að skrifa bréf með blaði og penna, heldur senda flestir tölvupóst.

Veikindi

2003-09-22T22:07:00.000Z

Þetta er nú ekki nógu gott þessa dagana, það eru bara allir veikir. Litli kúturinn minn hann Gabríel er með svo mikið kvef að hann getur lítið sofið, best að hafa hann upp í hjónarúmi á nóttunni til þess að fylgjast með honum, ekki nóg með það þá var dóttir mín Alexandra 4 ára eitthvað lítil í sér síðustu nótt og skreið upp í til okkar. Og þarna lágum við fjögur í queen size rúmi, ekki mjög stórt. Krakkarnir sváfu örugglega ágætlega en ég og Finni höfðum frekar lítið pláss, sem betur fer gerist þetta ekki oft. Seinni partinn í dag hefur mér svo slegið niður, nú er ég komin með hita, beinverki og hausverk, ekki mjög gaman en Finni ætlar að taka sér frí eftir hádegi á morgun til þess að ég geti lært eitthvað, ég þarf nefninlega að skila verkefni á föstudaginn og hef eiginlega ekkert getað unnið í því. Vonandi að ég og Gabríel verðu hressari á morgun.

Skólinn

2003-09-21T16:05:00.000Z

Í gær fór ég loksins og keypti mér möppur fyrir allar glósurnar og glærurnar sem ég þarf að nota í skólanum. Þetta er ég búin að ætla mér að gera í ansi marga daga. Ég byrjaði líka á tæknisögunni minni, og viti menn, allt í einu var ég komin með tvær A4 síður, það er nú aldeilis mikið sem maður getur skrifað um tæknina sem maður er að nýta sér. Ég ætla nú samt að fínpússa hana aðeins þannig að ég set hana ekki inn á bloggið mitt alveg strax. Næsta mál á dagskrá hvað varðar skólann er að klára orðaforðaverkefnið í Þróun máls og málnotkunar, áfangi sem ég er í á Yngri barna sviði, mjög skemmtilegur áfangi en samt svolítið mikið lesefni. Vonandi tekst mér að klára þetta í tæka tíð. Þetta er svo ótrúlega skrítið með skóla almennt, það kemur yfirleitt þannig út að öll verkefnin hellast yfir mann á sama tíma, þetta er nú kannski líka svolítið manni sjálfum að kenna en svona er þetta nú samt.

Jæja ég held að ég hætti þessu rausi og drífi mig frekar í því að byrja að læra, ekki veitir nú af.

Stress og aftur stress

2003-09-18T22:14:00.000Z

Núna er ég farin að stressast upp fyrir þetta verkefni Vefleiðangur. Mér finnst ég ekki fá neinar hugmyndir af efni sem ég get gert en vonandi á það eftir að koma. Þetta er svo skrítið að einhvern veginn reddast alltaf allt á síðustu stundu þó maður haldi að þetta eigi aldrei eftir að ganga upp. Það er ótrúlega mikið að gera í skólanum núna og hann Gabríel, sonur minn sem er 1 mánaða er ekki alveg að leyfa mér að læra, finnst soldið gaman að vaka á daginn og spjalla við mig. Ekki það að mér finnist það eitthvað leiðinlegt en þegar maður á að vera að læra og reyna að vinna verkefni væri maður alveg til í að fá að ljúka því af. En auðvitað veit hann ekkert af því, hann vill bara fá að njóta lífsins og láta stjana í kringum sig, auðvitað hver vill það ekki???

En þetta gengur nú samt örugglega allt saman upp að lokum, vona bara það besta en auðvitað gengur fjölskyldan fyrir.

Vefir fyrir kennara

2003-09-15T12:42:00.000Z

Þeir vefir sem ég hef skoðað sem er góðir fyrir kennara eru t.d. Skólavefurinn og þar eru ýmis verkefni í öllu greinum grunnskólans þar sem kennarar geta nýtt sér í kennslu. Það þarf að borga fyrir aðgang að verkefnum og leikjum en flestir skólar eru í áskrift þannig að kennarar geta nýtt sér það. Svo er auðvitað Námsgagnastofnun sem er mjög góð síða fyrir kennara, þar geta þeir séð hvaða bækur eru nýkomnar út og hvaða bækur eru væntanlegar. Einnig er t.d. að finna kennsluleiðbeiningar með Geisla, stærðfræðibókunum og margt fleira. Þar eru líka ýmsar krækjur sem kennarar geta nýtt sér. Að lokum ætla ég að benda á utn.is sem er upplýsingatæknisíða fyrir framhaldsskóla en þessa síðu geta kennarar sem kenna upplýsingatækni í grunnskólum einnig nýtt sér. Svo er líka Menntagátt, vefur sem er gerður af menntamálaráðuneytinu, á honum eru fréttir um skólastarf á ýmsum stöðum. Einnig eru margar krækjur þar sem hægt er að fá upplýsingar um allt sem tengist grunnskólum, leikskólum og fleira.

Tölvuleikir á netinu

2003-09-15T11:36:00.000Z

Á netinu er alveg frábær síða undir byrja.is þar sem hægt er að velja alls konar vefsíður sem innihalda leiki á netinu, sem dæmi má taka Disney.com sem er mjög skemmtileg síða og er mjög góð fyrir yngstu kynslóðina, svo er líka Krakkavefurinn og þar er að finna leiki eins og Pacman, Asteroid, sem er geimævintýri þar sem þú stjórnar orustuflaug, tetris og margir aðrir skemmtilegir leikir. Einnig er til síða sem heitir MSN Gaming Zone og þar er að finna ýmsa spila, kubba og teninga leiki og svo er auðvitað að finna marga aðra vefi inn á byrja.is. Einnig er gaman að kíkja inn á barbie.com ef þú átt prinsessu sem elskar barbie. Þetta var nú bara svona í stuttum dráttum hvar þú getur nálgast leiki fyrir börn á vefnum.

Ja hérna

2003-09-15T11:30:00.000Z

Ég er nú aldeilis hissa, ég var að komast að því að við hefðum átt að fjalla um tölvuleiki á neti og vefi fyrir kennara hérna á blogginu fyrr í þessum mánuði. En alla vegna ég er búin að komast að þessu núna og ætla því að fjalla lítilega um það núna ef það er ekki orðið of seint, vonandi ekki.

PowerPoint

2003-09-14T23:15:00.000Z

Ég ætla að gera glæru kynningu um pýramídana í Egyptalandi. Ég ætla að setja það þannig upp að fyrst fjalla ég um pýramídana almennt, hvenær þeir voru byggðir, hvað þeir eru margir og þess háttar, síðan fjalla ég um hvað pýramídar eru og hvað tilgangi þeir þjónuðu, síðan fjalla ég aðeins um stærsta pýramídann, The Grate Pyramid og svo að lokum fjalla ég um hvernig form pýramídanna þróaðist.

Ég set aðal punkta á glærur og tala svo og útskýri út frá hverjum punkti. Ég ætla sem sagt að reyna að gera þetta fyrir fjarkennslu, þ.e. að tala inn á glærurnar. Þetta kemur allt betur í ljós þegar verkefnið er lengra á veg komið. Efnið er ætlað fyrir nemendur á miðstigi grunnskóla.

Pýramídar

2003-09-13T16:17:00.000Z

Jæja hvað haldið þið, ég er búin að finna mér efni fyrir kennsluefnið sem ég á að setja síðan upp í PowerPoint. Það er um pýramídana í Egyptalandi. Ég held að það gæti verið áhugavert kennsluefni sem flest allir eru áhugasamir um. En þetta kemur ekki inn á bloggið mitt fyrr en á morgun. Ég ætla að reyna að nýta daginn í að útbúa þetta allt saman.

Á haus

2003-09-13T12:10:00.000Z

Nú er ég gjörsamlega á haus í skólanum, það er svo mikið að gera akkúrat núna að ég er að verða geðveik. Ég á að skila þremur verkefnum fyrir 15. september og viti menn, það er 13. september í dag. Nú verð ég bara að hella mér í þetta og drífa þetta af. Ég er búin að skila vefrallýinu en á eftir að gera kennsluefni í powerpoint en ég hef góðan tíma í dag þannig að ég leggst yfir þetta.

Vefrallý

2003-09-13T12:06:00.000Z

Hér kemur verkefnið mitt í Upplýsingatækni og skólastarf sem er vefrallý um Námsgagnastofnun.

Vefrallý er verkefni sem gengur út á að svara spurningum á sem skemmstum tíma. Spurningarnar sem þú átt að svar nemandi góður eru hér fyrir neðan og átt þú að skrá svörin hjá þér í ritvinnsluskjal.

Svörin við spurningunum finnur þú á heimasíðu Námsgagnastofnunnar. Þetta getur orðið flókið á köflum en ekki gefast upp.

Hér koma spurningarnar:

Hvaða tilgangi þjónar Námsgagnastofnun?

Hvað gefur Námsgagnastofnun út marga bókatitla á ári?

Nýlega kom út kennsluforrit sem hefur að geyma sögupersónuna Glóa geimveru, til hvers er þetta kennsluforrit?

Hvað eru starfsmenn Námsgagnastofnunnar margir?

Námsgagnasofnun er í samstarfi við nokkur erlend útgáfufyrirtæki, hver eru þau?

Hægt er að nálgast ýmiskonar námsefni á vef Námsgagnastofnunnar, þarf að greiða fyrir þessa þjónustu?

Hvaða tilgangi þjónar hin nýútgefna skólabók Skriffinnur og fyrir hvaða aldursstig er hún ætluð?

Vefur Námsgagnasofnunnar gegnir þríþættu hlutverki, hvaða hlutverk eru það?

Hægt er að skoða krakkasíður á þessari síðu, hvað síður eru það?

Hvenær er Alþjóðadagur læsis?

ADSL

2003-09-12T21:25:00.000Z

JIIIIBBBÍÍÍ núna er ég loksins komin með ADSL tengingu og það á fjórfalt meiri hraða en áður hefur verið. Við fengum okkur ADSL hjá Og Vodafone og erum búin að vera að bíða eftir að það virki í tvær vikur, en loksins er það komið í lag og núna get ég verið eins mikið á netinu og ég vil eða réttara sagt þarf, skólans vegna. Ekki það að ég hafi mjög gaman að hanga á netinu að ástæðu lausu.

Jæja ætla að hætta þessu núna og fara að njóta þess að það sé komin helgi og fara að gera eitthvað skemmtilegt. Set síðan vefrallýið inn líklega á sunnudaginn og líka hugmynd að kennsluefni í powerpoint.

Kettir

2003-09-12T10:00:00.000Z

Ég lenti í hræðilegri lífsreynslu í gær. Við vorum með gesti í mat og þegar við vorum alveg að verða búin að borða stendur annar gesturinn upp og fer að labba um íbúðina, spyr svo hvort við séum með kött, ég hélt nú ekki þar sem ég hata ketti. Hann bað okkur um að koma og sjá, hvað haldið þið það bara sat eitt stykki köttur í barnabílstól sonar míns, ég auðvitað fríkaði út en maðurinn minn sá um að koma honum út. Málið er að við vorum með galopinn gluggann í eldhúsinu eftir að við kláruðum að elda og helv... kötturinn hefur komið þar inn. Ég hafði auðvitað svo miklar áhyggjur og fór að ímynda mér ef við hefðum ekki fundið hann og hann hefði kannski laumað sér upp í vöggu sonar míns um nóttina eða eitthvað, það hefði verið hræðilegt. Ég ætla að vona að það sé til eitthvað sprey eða eitthvað svoleiðis til þess að fæla ketti frá til þess að ég geti opnað glugga aftur á íbúðinni minni.

Persónulegur vefur

2003-09-08T13:43:00.000Z

Jæja þá er ég byrjuð á persónulega vefnum mínum sem ég er að gera á námskeiðinu Upplýsingatækni og skólastarf og það gengur bara vel. Þetta er svo lítið mál þegar maður sest bara yfir þetta í dálítinn tíma og bara byrjar. Ég er búin að setja upp síðu fyrir verkefnin sem ég á að skila og forsíðuna. Svo gerist þetta bara hægt og rólega. Ég er búin að vera að leggja hausinn í bleyti til þess að finna efni sem ég á að gera vefrallý um, það kemur fyrr en síðar.

Það er meira en nóg að gera í skólanum, fullt af verkefnum í öllum fögum og ég er á haus en vonandi róast þetta aðeins þegar líður á, eða maður fari bara að ná betri tökum á þessu.

Helgin

2003-09-05T14:24:00.000Z

Það verður nóg að gera hjá mér um helgina, ég er búin að vera að læra í allan dag, er svo að fara á opnunina á nýjum veitingastað sem heitir Maru, áður Sticks´n Sushi. Svo í fyrramálið er ég að fara með dóttir mína í fimleika og síðan auðvitaða að horfa á landsleikinn og svo bruna upp í sumarbústað til vinafólks okkar.

Það sem ég er að reyna að komast að núna er hvernig hægt sé að setja inn comment inn á blogg síðuna.

Vangaveltur

2003-09-01T18:33:00.000Z

Mér brá nú heldur betur mikið þegar ég var að skoða síðu námskeiðsins. Þar las ég að við ættum að skila vefrallí og fyrstu drögum að kennsluverkefni í powerpoint. Ég man nú alla vegna ekki eftir því að hafa fengið það verkefni í hendurnar en ætla nú samt að senda henni Salvöru póst til öryggis til að vera viss um þetta.

Skírn

2003-09-01T18:13:00.000Z

Það er búið að vera mikið að gera hjá mér síðustu daga. Ég er að byrja að skipuleggja mig í náminu og það gengur ágætlega, þ.e.a.s. þegar litli kúturinn minn leyfir mér að komast í tölvuna.

Við skírðum hann í gær og heitir því nú Gabríel.Systir hans hún Alexandra fékk að vera með í ráðum um nafnið og erum við öll mjög sátt við það. Við héldum skírnina heima og svo var rosa fín veisla á eftir. Hérna eru myndir af systkinunum.

Síðustu dagar

2003-08-28T12:16:00.000Z

Jæja, ég hef nú ekki skrifað mikið síðan í staðbundnulotunni en nú er allt að róast svo ég get hafist handa við þetta allt saman. Ég er búin að vera að reyna að átta mig á þessu fjarnámi og það gengur bara nokkuð vel.

Hrefnuveiðar Íslendinga

2003-08-18T13:23:00.000Z

Nú er allt að varða brjálað. Íslendingar byrjaðir að veiða hvali og hvalaskoðunarfyrirtækin eru ekkert ánægð með þetta. Svo er líka frétt um hvalveiðar Íslendinga á BBC fréttastöðinni.

En hvalveiðar voru stundaðar frá fornu fari á Íslandi. Það er til Hvalavefur sem byrjaði einmitt sem verkefni hjá Kennó.

Þátttaka í umræðum

2003-08-18T13:06:00.000Z

Ég fór inn á málefnin.com til þess að prófa að taka þátt í umræðum. Þetta var nú ekki mikið mál, ég valdi bara þann flokk sem ég vildi taka þátt í, skoðaði hvað aðrir höfðu skrifað og bætti svo mínu innleggi við með því að smella á hnappinn "Svara efni". Þetta er mjög auðvelt, eitthvað sem allir geta tekið þátt í.

Félagsleg kerfi á netinu

2003-08-15T16:21:00.000Z

Nú geta allir eignast vini eða ástvini með aðstoð vefsins. Það er hægt að nota ýmis félagsleg kerfi á netinu til að kynnast fólki. Þeir sem hafa áhuga á slíku geta notast við forrit sem heitir Friendster sem er vinanet, einkamál.is fyrir þá sem vilja komast á stefnumót og málefnin.com fyrir þá sem vilja taka þátt í þjóðmálaumræðum, svo einhvað sé nefnt. Ég hvet fólk eindregið til að fara inn á þessar síður og skoða og taka þátt fyrir þá sem vilja.

Tengt í sessunauta

2003-08-15T16:09:00.000Z

Ég sit hérna í faginu Upplýsingatækni og skólastarf. Sessunautur minn er Elsa Lára.

Kynning á mér

2003-08-15T15:54:00.000Z

Ég heiti Margrét Guðvarðardóttir og er 26 ára. Ég er búsett í Kópavogi og hef gert það frá 5 ára aldri. Ég er nemandi á 2. ári við Kennaraháskóla Íslands. Ég var í staðnámi í fyrra en flutti mig yfir í fjarnám núna þessa önnina af því að ég var að eignast barn fyrir viku síðan og treysti mér því ekki í staðnám. Ég ætla að reyna að vera í fullu námi en það kemur betur í ljós þegar líður á önnina. Kærastinn minn heitir Friðfinnur, kallaður Finni og við eigum saman tvö börn, Alexöndru sem er 4 ára og litla kútinn sem hefur ekki enn fengið nafn en það er í vinnslu. Þessi staðlota á eftir að vera pínulítið strembin af því að ég þarf alltaf að fara heim að gefa, en litli kútur er svo góður að þetta verður ekkert stórmál.

Byrja

2003-08-15T09:32:00.000Z

Hér byrja skrifin...